Voparinchea Bhanddarantlem

Voparinchea Bhanddarantlem:
"Dis Astanam Vatt Cholchi"

Aizchem az kor,faleam dovrinaka. Faleam kednach udeunchem nam. Sarloli goddi porot mellchi-nam. Disachea uzvaddak zata tem, ratichea kallokhant dovrinaka. Dant astanam chonne kha. Bholaiki astanam vavr kor. Disti poddtanach dusrean-chem boreponn polle. Aikun zatanam moddun uddoinaka.Chintunk-yevzunk zatanam, dus-reachem, borem chint. Kalliz dhodd’dhoddtanach dusreacho mog kor, jiben ulovnk zatanam, dhin’va-xit rav ani dusreanchem borem uloi ani dusrea pasot vavrunk zatanam, kednach fattim soronaka!

Dispottem korchem
Dor disa eka mon’xan apunn tea disak kitem kortolo tem monant haddchem. Ani goroz poddlear kagdacher borovchem. Ani boroil- l’ea ani tharail’lea pormannem korchem. Tras poddtat mhonn fattim sorchem nhoi. Hanv Kannkona gonvllik vavr kortanam, mhaka dog bhav mell’le. Dogui ‘twins’, zonvlle, te Mumbai ravtale.Te dog-ui xallek vetale. Xikpant-ui huxar asle. Punn xikxonnant yes mellunk tancho ek ghutt aslo.Te aichem az xiktale, faleam dovri-nasle. Xallent kitem xikoilam, borovnk lailam tem ratcho kitlo vell zaum, aplem xikop sompounuch nhidtale. Hech pasot tankam xikpant khup yes melltalem. Hea dog-ui bhurgeam kodde hanv zaitench xiktam. Ak’khea disak hanv kitem kortolom tem sokallim hanv yevjitam ani borovn kaddtam, tem mhaka chodd faideachem zalam. Disbhor tem mhojea mezaruch asta. Ek-ek tantlem korun sompoitoch hanv tem cancel kortam. Yevjil’leo boroil’leo tantleo vhodd tem kelear jivak anond bhogta, urlam tem dusrea disak korchem poddta.Punn tem thoim kiteak urlem hacher chintun panvl fuddem marchem poddta.

Manddavollin korchem
Zaite zann bazarak vetanam khoim vochunk zai, kitem haddunk zai tem manddavollin borovn vetat.Tea magir boroilam tem ghevnk sompem zata. Az eke vostuk lagun bhair sorunk titlem faideachem zainam.
Ani manddavoll korinastanam gelear, thoim tea zagear pavunk pasun,kitem ghevnk zai, tem tuka ugddas zainam. Punn il’lo vell ghevn adim fuddench tharailear kitlo vell, tuzo, tukach melltolo. Thodde nimannea vellar ravtat. Te mhonntat nimannea vellar sogllem borem zata. Poilo vell aslo torui tancho puro foll kaddunk zainam. Punn kosle-i vostucho backbone tori ghoddun dovrum yeta. Omkeach vellar tuvem omkich vost sompounk zai, ani tum piddent poddlo zalear vo okosmat tujea jivitant tufan upraslear magir hem mhotvachem tem konn sompoitolo? Aichem az soddun nimannea vellar ravlear jivtant zaitem luskonn zaum yeta.

Khasgi dairi
Thoddeank dor disa jem tanchea jivitant ghoddtat tem borovn dovorchi sonvoim asa. Hi ekdom’ bori sonvoim. Punn boroita tem eka surokxit zagear dovrunk zai. Tuje personal comments zoriui konnachae-i hatant poddle zalear zaitem vaitt zaum yeta.Ti ‘diary’ titli khasgi nam zalear ani eka disa ti konnak-ui mell’li zalear tuji biography ghoddie borovn kaddtole. Amchea bhitorleam thoddeam kodde apleam ghorchean-cho, ixtt- mitranche, soiream- diareanche, pott’te, fonache ank, vadd’dis borovn astat. Tea kompiutoracher ani mobailacher chodd patiyeunk zata? Ani je apleo personal diaries ghevnuch bhonvtat tankam magir aicho vavr az korunk khup sompem zata.

Bhorvanxachem panvl
Thodde aplea jivitantlo ek tori ogunn bhair kaddunk, dor disacho faido kaddtat. Monant haddun to ogunn dor disak to jivitantlo pois korunk bhorvanxan proytn kelear eka disa zoit amchem zatolem!. Disachi vatt chol’lea ti ratchi nhidunk veche adim ontoskornnachi chovkoxi kelear chodda faideachi zatoli .Sokallim utthla tem nhido porian ami kitem borem kelam tem amchea monat haddpa-chem .Sogllea boreponna pasot Devak dhin’vascho ani Takach argam divchim. Utt’thanam tem nhido porian ami chukleat asot, Deva-kodde ani ekameka kode bhogsonneem magchem ani hem kelea uprant, faleancho dis koso sartolim tem tharavchem. Hantum jivtachi khoxalkai asa. Dor disachi dor ek goddi mogan sar, allsai tujea jivitant yevn raj cholounk sodtoli tika yevkar dinaka, ti aichem faleam vhorun tujem jivit nisontonnak pavoitoli .Tache adim chotur rav ani dis astanach tuji vatt chol!

Nevel Vell'lekar

“ Eka lognak bara vignam”
‘Love Marriages v/s Proposed / Arranged Marriages’, hea vixoyacher ek pavtt ‘debate’ zali. Zaitim karonnam sangun, ap-aplo pongodd zoitivont korunk, tornnateanche proytn zale. Mogachim lognam borim mhonn, ek pongodd aplim karonnam sangot ravlo. Mogan logn zalolo zat-kat mandinam, gorib-girest mhonn vollkhonam, nennar-zannaranchi ontor korinam, punn sogllea vegllocharacher tancho mog zoit vhorta. Mogan axil’lo aplea sangateak asa toso mandun gheta ani tacho mog torekvar proxnank fuddo korta.
Soirikechim lognam borim mhonntolim oxem mhonno: Mog-mog mhonntat tim lognam adinch fog kortat. Zaite pavtt avoi-bapaiche khuxe add, tancho axirvad nastanam tim logn zatat. Tea uprant tanchea logni jivitant vhoddilanchi budh ani adar tankam mellonam.
Don-ui pongodd zhogoddtanam, eklean oso aplo sondex dilo. “Amkam mogachim lognam nakat ani soirikechim lognam nakat. Amkam zai teo ‘proposed love marriages’. Konn tori vo zonn eklo dusreak ‘propose’ korta ani magir tancho mog zata. Mogachi tenkxi koxi, tancho mog lognachi gantt marta. Koslim-i zaum tim lognam, punn aiz tankam bara vignam. Kiteak kai?
Aiz logn zal’leam modem magnnem nam. Sokallim utt’tanam ghov-bail veg-vegllea vellar utt’tat. Punn nhidunk tori vangdda vochunk zai aslem. Nhidunk veche adim Devak ani ekamekak dhin’vaslolo zalear, Devachem ani ekamekachem bhogsonnem maglolem zalear, Deva ani ekameka mukhar apleo gorzo khaltikayen ghaleleo zalear...oslem magnnem logni jivitant folladik zavpachem. Devachem Utor amchea panvlank uzvadd zata, tersachem magnnem Saibinnichi bhokti vaddoita ani Jezuchea soddvonnechea ghuttant amkam vantto dita.
Aiz logn zal’leam modem somjikai nam, sosnnikai nam. Ekamekak tim asat toxim mandun ghenant. Eka mekacheo osoktayo somzonant. Dusreacheo chukeoch kaddtat. Dhin’vasnni disonam. Khaltikai nam, sogllo gorvixtt utrancho boddbodd! Zonn eklo ap-aple bhaxen sogllim kamam korunk sodta, dusreacho adar-sohokar ghevnk sodinam. Matxi chuk zalear, sogllench ifern zata. Jem lhan utramnim, somjikayen sangum yetalem, tem ragan tapon sangtat. Sosnnikai mat-ui disonam. Haka lagun aiz lognam tuttun-futtun poddtat. Aiz logn zal’leam modem bhogsonnem nam. Monis osokt. Osoktayen to khala poddta. Punn dusro taka somzun ghenam. Bhogsunk konnuch toyar nam. Dusreacheo chuki monis bhogxinam tem pollevn to aplea khas jivitant chuk korinam-so dista. Bhogsonnem dinastana-ghenastanam aiz kitlim logn zalelim vorsanchim-vorsam ragan ani ekameka lagim uloinastanam jiyetat. Oslim Deva koddlean tori aple chukik bhogsonnem magtat kai?
Aiz logn zal’leam modem bhasabhas nam. Zonn eklo aplea monantlem korta. Dusrea kodde ani budh ghevop nam. Apunn korta tem sodanch sarkem, oxem taka dista. Ani taka dusrea lagim ulovnk, bhasabhas korunk vell nam. Bhasabhas kel’li zalear kitle proxn suttave zavpache, kitle dubav pois zavpache, ani logni jivitant kosle tharav ghetat te yesvont zavpache. Dog zannanchim chintnam ani dog zannanche anvdde bhasabhas korun ekttaim haddlear, logni jivit mozbut zavpachem. Logna disa dadlo ani ostori kallzan, monan otmean ani kuddin ek zal’lim. Logni jivitantlim vignam pois korunk, anvdel’le anvdde ani chintlelim chintnam logn zal’leancho sasnnik bandpas mozbut korum-di.

Nevel Vell’lekar
“ Adim Dom Pedro,
Atam Pedurlo”
“Nanvant kitem asa?”.-..... oxem mhollolem ami zaite pavtt aikolam. Khorem mhollear nanvant zaitem asa. Amchem nanv amchi ollokh dita, borem jivit jiyelear amchea nanvak man yeta, ami vaittache gulam’ zalear amchea nanvacho beman zata. Amchea poilea nanvak ami Kristi nanv mhonn-tanv zalear, thoddeank tanchea kuttumbachea nanvan (alcunj) ollkho-tat. Amchea ghorannea-chem vhoddponn am-chea kuttumbachea nanvant asa.
Adim amchea Kristi ghorabeamnim bhur-geank Saibinnichim vo Santam-Bhoktanchim nanvam ghaltalim. Oslim bhurgeank nanvam ghalunk avoi-bapaicho ek hetu aslo. Tim ek bhagevont jivit jiyeunk tanchem mon aslem. Amchem nanv koslem-i tem zaum, punn zaiteam nanvank orth asa. Ami amchea nanvam por-mannem jiyeleanv? Thoddim nanvam zorui tim khup valorachim, torui tim nanvam asloleam mon’xachem jivit urfattench zalam. Tan-chem nanv Saibinni-chem vo Santam-Bhoktan-chem, punn tanchem jivit devchara-chem. Bhoktak tannim okman kela. Tim bore dekhichim zavnk nant.
Thoddeanchim nanvam bhov gomo-tichim Piedade, Con-ceicao, mhollear dadlo vo ostori ti kainch gomonam. Hanv Diva-ddechea Piedade Saibi-nniche Igorjent gonvllik vavr kortalom tednam ek avoi aplea cheddum bhurgeak Saibinnichem nanv, Piedade ghalunk aili. Piedade, cheddo vo cheddum tem kainch somzonam, oxem tika zaiti somzaili. ‘Aplem nanv Piedade mhonn tea sobit cheddvak vhodd zatoch loz zait, dekhun Piety tori tika nanv ghal’ mhonn hanvem tika zaitem suchoilem. Punn ti koxich halonam zali. Tea cheddvak Piedade mhonn zapailearuch, aiz tem lojen apli man khala ghalta.
Thoddeanchim nan-vam orth naslolim. To dans tednach ailolo. Tea nachachem nanv ko-nnem aplea cheddeak ghalem. Aiz taka ‘Disco’ mhollear konn-ui ollk-hota. Taka nachunk titlem gomonam, punn Disco mhollear to rokddoch paim haloita. ‘Skylab’ ontrollar disti poddlem ani konnem aplea cheddvak tea nanvan Povitr Snan dilo. Ani fuddarak koslim novlam ghoddchim asat?
Thoddim disa por-mannem nanvam asat. Adim ‘Almanak’ pollevn tea disacho Sant vo nanv konn tem pollevn bhurgeak nanv dovor-talim, ozun dovortat. Itihasik dis nanvamnim aileat. Jezuchea punor-jivont-ponnak konn-ui zolmolear to Resurrecao zata. Povitr Khursachea Zoitache Porbe somoyar zolmota taka, Exaltacao mhonn-tat. Purificacao, Comme-moracao oslim disa pormannem am-kam nanvam melltat. Punn hea kallar oslim nanvam sobit kai?
Don nanvanchim okxoram kaddun tho-ddeamnim bhurgeank nanvam ghaleant Me-nino ani Natalinachem cheddum Mena zalam Josinho ani Elsie-cho cheddo Joel zala. Him nanvam vaitt nhoi, punn kednaim-kednaim oslim nanvam hanso haddtat. Ligorio ani Onorata-hancho put ‘Lion’ zavnk nam? Thoddeanchim nanvam dakttim keleant Natal Natty zalam, Antonette Antu zalam, Alvaro Alu zala ani Bostiao Bobby zala. Magir osleank tanchea nanvan konn ollkonam, hea ‘short form’-anuch ollkhotat. Tinch pasun tanchi khorim navam thodde pavtt visortat.
Thoddeam ghora-beank mon’zatichea nanvamnim ollkhotat. Mazrager, Koleanger, Vaghanger, Xinvanger, Makddanger mhollear tanchim ghoram rokdd-inch melltat. Toxinch thoddeank add nanvam asat. Garsul’lo, hodd’-ddo, undir mhonn te famad zaleat. Thodde pavtti okmanachim nanvam tim!
Thoddeank nanva-mnim ollkhonant punn ‘pet names’ asat tachean ollkhotat, Bushan, Baby, Bebe, Nanu, Nana oslim pet names vete-panvlak melltat. Tanchim sarkim nanvam kaddlear konn-ak ulo kela mhonn tim ogich ravtat, punn tanchim ‘pet names’ kaddlear tim rokddinch zagovtat. Kazari ekame-kak ‘Honey’ ‘Shana’, ‘Love’, ‘Sweetheart’, ‘Raja-Rani’, ‘Prince’, ‘Princess’, ‘Queen’ heam nan-vamnim pachartat. Punn thoddeach kallan tanchi goddsann veta.
Thoddeam mon’xa-chim nanvam zon’va-rank ghaltat, Sunneank Roger, Bruce Lee ani mazarak Sangeeta ani Ruby, ho mon’xank kedo vhoddlo okman!
Kitem zaum koslem-i nanv amkam asum, Dom Pedru Pedrulo zaum, punn amchem jivit Devachea moga-chem ani peleache sevechem zaum!

Nevel Vell’lekar

“Mazor Maslli Soddit, Tednam Bebdo Soro Soddtolo”
Bebdikai ek pidda. Bebdikayek lagun kitleamnim aplem jivit ibaddlam, ghorabe kosoddleat ani somazachem noxtt vaddoilam. He piddek ilaz asa mhonn zaite visorleat. Punn zannim aplem bebdikayechem patok ollkhun ghetlam, jivit novsorlam, tannem khoxalkayechem zoit melloilam.
Nicky D. hachi khobor zaiteamnim aikolea. Tachem mullavem nanv Nicholas D’Silva. Vell’lle ganvcho, amcho soiro to. Belganv xiktalo. Xikpant ani khellant huxar aslo. Ixttam borabor misoll zatanam soreant-ui misoll zalo. Bebdikayechea barantuch xikop sompoilem. Mumboichea ‘Bank of Baroda’-nt-ui nokri melloili. Eka disak ‘Bank Cashier’ zalear dusrea disa Benkichea panvddear bosun moddiche poixe meztalo. kazarache pirayecho zatoch, Leonniechea mogan poddlo. Tika mellunk vetanam soro kednach pivunk nam ani Leonniek Nicholas bebdo mhonn kosloch dubav poddunk nam. Kazar zatoch tanchea ekvottak dogam bhurgim zolmolim, Myrtle ani Maud. Itlea mhonnosor Nicholas-an aplea kazarachem sutt ani kazarachi mudi pasun vikun kaddloli. Poixeank patixer zavn to Leonniek boddoitalo. Nicholas eka darantlean bhitor sorta zalear, Leonnie, dogaim bhurgeank khankeant marun, dusrea darantlean dhanvtalem. Mezachea govetant, ghalun pasun, tinnem bhurgeank samball’lim. Myrtle iskolak vetana, Nicholas lokot-lokot aple dhuvek soreache noxer pavounk vetalo. Sisterin taka pollelo ani to konn kai mhonn Myrtlea lagim vicharlem. To bebdo aplo bapui mhonn sangunk, taka loz disli. To aplo bapui nhoi, punn aplo ek xezari mhonn tannem sanglem. Hi khobor dusrea disa iskolak vetanam, Myrtlean aple avoik sangli. Tednam Nicholas nigtoch uttlolo. Aple dhuvechi khobor aikun taka jintt marli. Apleak lagun aplo ghorabo sonsta, hem taka thavem zalem. Dolleantlean dukham vhanvtalim. Apunn soro soddtolo mhonn thoinchea thoimsor tannem nichev kelo. Tea disa thaun tannem soreacho ghontt ghevnk nam. Nicholas aslo to Nicky D. zavn bebdikayek sampoddloleank he piddentlo bhair kaddunk vavurta. Ratchea khuinchea-i vellar, konnem-i fon marlear, tanchea akantak rokddoch dhanvta. ‘Mercilite’ hem AA-chem masik to vhodda umedin choloita. Nicky D hem uzvaddit kirnn soglleak fankarit asa.
Zaiteank hi bebdikai bhurgeponnich suru zata. Kazarank ‘party’-ank soro funkott mellta. Funkeacho soro aiche tornnate dhonkit ravtat. Tanchea pievpak xim’ ani mer nam. Zo tornnato piyenam to tanchea borabor sobonam, taka kuxin kaddtat. Aiche tornnate, bieracher suru kortat...... tea uprant viski, brendi, rum, xevottak feni! To soro ‘branded’ asunkuch naka, koslo-i upkarta. Funkea mellonam tednam poixeamnim piyetat. Piyeunk poixe nam zatoch chortat, nagoitat. Mhojea jivitant hanv ‘wine’ soddun kosloch soro pielolo nam. ‘Cheddum zalam re, hatak kanknnam ghalun bhonv,’ oxe mhaka challoitale. Heam mhojeam ixttank sokallim utt’tanch soreacho ghontt zai zalo. Nam zalear tanche hat koddkoddtale. Sokallim dha vaztam, te maddak veng marun astale. Tantuntle thodde aiz maddak veng marlole-i disonant. Challis zavche adim morun somple.
Bebdikayek sampoddlolo monis aplench jivit ibaddta. Tachea jivitant tea uprant Devak zago uronam, magnnem, mis, ters mhollear taka ek fokann koxem zata. To magir chor-nagovnno zata. Tachea tonddantlean noxtteam utranchem lisanv bhair sorta. Taka sarki jhem poddonam. To torekvar piddancho gulam’ zavn bhonvta. Apli zobabdari visorta. Tachea jivitantlo hetu pollun veta. Nitollsann mhellsannint bodolta. To aple mornnache dis mezta.
Bebdikayek sampoddlolo monis aplo ghorabo konsllun uddoita. Taka ghorabeacho ‘time table’ lagonam. Taka lagun tachim ghorchim vangddi sonstat. Tea bebdeak lagun tankam kitlem mhonn unneponn! Osoch mhozo ek titiv aslo. Newton 45 mhollear taka konn-ui vollkhotalo. Tannem aplem jivit soreak bhettoilelem. ‘Are to tuzo soiro nhoi re’ oxem mhoje ixtt mhojim fokannam kortale. ‘Soiro nhoi, punn mhozo khas rogtacho titiv to’ oxem mhoje ixtt mhojim fokannam kortale. Soro pivon-pivon to somplo. Ghorabeacher kallo dag ghalun gelo.
Bebdikayek sampoddlolo monis somazachem noxtt vaddoita. Taka konnuch man dinam, punn ho somaz taka kenddta. Eka bebdeak lagun somaza-chi xanti bigoddta, bolatkar vaddtat, khun-maramari choddta, fodd-modd, zhuzam-moddam toyar kortat. Somazant ontor disun yeta.
Bebdikai jivitachem, ghorabeachem, somazachem, nisonnton korit asa. Ani voilean bebde lok, Jezun udkacher axirvad ghalun soro kel’lo, to vaitt zavnk zainam oxe boddboddtat. Jezun soro mon’xachi loz vattavnk kel’lo, il’lo piyelear vaitt nhoi to, punn hispa bhair piyelear, soglleankuch lojek ghalta. Soro sodd ani novea jivitak survat kor, tednam Dev tujem jivit, ghorabo ani ho somaz axirvadan bhortolo.

Nevel Vell’lekar