Rendermam Maddancho Ixtt

Rendermam Maddancho Ixtt
Fottu ani lekh Pantaleão Fernandes


Rendermam maddar choddta...

Gõychea khubxeam ganvamnim, sokallchea vellar ani ek bhonvddi marit tor, amkam renderman distolo. Gõyant maddancho soro kaddop ho ek poromporik dhondo. Ho dhondo eka kallar boreach nettan choltalo, punn aiz tacho xevott zavpache dis lagim pavleatxe dista.
Rendermam sokallim utton kati ani dudinem ghevn maddank veta. Vevosthit ritin khampam marlele madd choddta. Poyek damnnem lailelem asta tantuntli sur damnneant otoita, poyek xev ghalta ani denvta. Oxem to sanjecheai-i vellar korta. Zalear don’parchea vellar xev ghalunk maddar choddta-denvta.

Rendermam maddar choddun ruchik sur kaddta.

Maddanchi taj’ji sur pivonk godd lagta. Khubxi sur bhannant ghalun tacho soro kaddtat - maddanchi feni vo soro. Ho soro khubxe zann piyetat - thodde bholaikechea nanvan vokhod koxem piyetat.
Manddancho soro sabar bhasanche ruchicho kaddtat - maullingacho, aleacho, adi. Osle ruchicho ani torecho soro itlo boro asta, sonvsarbhor fanki zalele kazu finyek legit kuxin kaddta.
Maddanche surechi vinagr-ui kortat. Hii vinagr uprant jevnna-khannak ruch yeunk vaportat. Tea xivai maddanchem godd-ui toyar korun viktat.

Rendermam kulo galta to

Ban’navlecho Domingo Fernandes. To renderacho put, oxem sangta - “13 vorsanche pirayer hanv poilech pavtt maddar choddlolom. Aiz mhaka 60 vorsam bhorlim, ani madd kaddunk laglear 50 vorsam. Sokall, don’par ani sanz mhonnlear hanv disantlean 75 pavtti maddancher choddtam-denvtam”.
Domingachi potin-ui aplea potik hea vavrant mozot korta. Surecho soro kaddtoch zo goddo zata to dukrank ghalun posta ani vikta.

Rendermam aplea iontra sangata dista.

Toxench vinagr korun vikta. Heach dhondea udexim tannim apleam dogam dhuvank kazar keleant, tacho put pordesant nokri korta.
Pavsacheam disamnim maddar vochop mhonnlear bhirant; kiteak pavsachea udkan maddancher xello zalolo asta ani taka lagun, madd choddpeak - denvpeank nisorpachi xoketai asta. Torui rendermam vevosthit ritin pavsacheam disamnim maddancher vavr korta.
Eka kallar Gõychea dor eka ganvant zann lok renderacho dhondo kortalo. Punn aiz ho dhondo thoddo- thoddo korun unno zait veta. Hache fattlean sabar karonnam asat. Renderancho ankddo ani dhondo unno zait gela dekhun maddanchea borea soreacho-i unnav (shortage) zait veta. Taka lagun aiz khubxe zann boreach promannan bhesoll soro kaddtanam distat. Oslo soro bholaikek vaitt.