Udok Doxim Zait,Rogot Doxim Zainam

Voparinchea Bhanddarantlem:

“Udok Doxim Zait,Rogot Doxim Zainam”

Mhojea bhur-geaponnaveli mhaka zaite pavtti yad yeta.Sanje vellar ami chukoinastanam khellunk vetale. Kednam-i mogan khelltale, kednam-i zhogoddtale. Amche modem dog bhav asle. Eka bhavak konnem-i chavoi-lear vo tache kodde konn-ui zhogoddlear dusro bhav tachea adarak yetalo ani tachea bhavak challoito-leak boddoitalo. Hea bhavanche vattek vochunk ami bhiyetale.Tannim vaitt porian kelear ami ogich sostale, boslole kodden mar konn khatolo! Heam bhavancho ekvott pollevn hanv ojap zatalom.Tancho ghorabo ekvottit urtolo oxem hanv somzotalom.

Xetant ner zalo
Punn oxem ghoddonk nam.Te dog-ui logn zatoch tanchea ghorant tancheo bailo aileo. Ekvottachea biamnim ner vompun geleo. Ghorak, bhattak lagun kestanvam suru zalim.Gharant modekotuch ek vonnot ubi zali. . . atam ekamekachem tondd legit disonam.Eka bhavan paik vhela ani dusrea bhavak maim dilea. . . tanche-i vantte keleat! ‘Rogot kednach doxim zainam’him utram mhojem mon ghansaitat.

Dovlot zogddim laita
Punn dusrea vordan anik eka ganvant halinch hanvem dogam bhavanchi khobor aiko-lea.Te-i ghor-bhattak zhogoddtale. Duddvanche axen tankam doxim kel’le. Apleak poddta to ghor-bhattacho vantto mellovn ghevnk te ‘court’- ant pavlole. Ekamekache vhodd dusman! Okosmat vhoddlea bhavacheo don-ui ‘kidney feil’ zaleo. Kitle duddu korchunk toyar, punn ‘kidney’ mellonam ani ek-dog zann poixeanche axek apli ‘kidney’ vikunk fuddem sorunk sodtale, punn tache kidneyk ‘match’ zainam. Konn ekleachi kidney ‘match’ zali ani tea don-ui kidney ‘feil’ zaleleacho jiv vattailo.

Konn pavlo?
Zannant tumi hea piddestak konn pavlo to? Tacho nizacho dusman mhonn somzotalo tacho dhaktto bhav. Taka zaiteam oddchonneank fuddo korunk poddlem, punn to fattim sorlonam. Apli ‘match’ zateli ek kidney oxem mhaka dislem.

Lhanponnim ekvottant
Punn hi ghoddnni soddlear, az amkam ekvottachem chitr titlem sobit disonam. Lhan astanam avoy-bapai vangdda bhurgim khoxal-kayen jiyetat. Bhav-bhoinnancho ekvott sasnnak togpacho oso dista. Punn vaddtam-vaddtam hea ekvottachea chitrak konn tori apleponn-acho lep kaddta. Ghor-bhatt avoy-bapaichem, punn bhurgim tanchim vantteak zhogoddtat. Dot divn logn kel’li dhuv kaidean aplo vantto sodta.
Avoy-bapaichem rinn asa zalear tanche vantte korun, farik korunk konn sodinant, punn avoy-bapaichem kitem aslea-ruch bhurgeank tacho vantto zai. Vostu borobor mon’xanche-i vantte kortat.

Dusmankayecheo vontti
Ekach ghorant jiyetanam thoim dusman-kayecheo vontteo ubeo keleat. Mon’zaitichem, bhurgean-chem nib ghevn heo vontteo tim mozbut korit asat. Eka ghorant don pavtti Saibinnichi bhett, punn konn-ui denngi magunk gelear divchi poddta mhonn ekuch ghor mhonn eklo dusreacher lott’ta.Thoddeanchea ekach ghorak don ank poddleat. Ekach ghorak bizlechim,udkachim, kebolachim, fonachim, veg-vegllim bilam yetat. Bhurgim kaim ekameka lagim zhogddonkuch nant, punn bhav-bhavanche dusmankayek lagun tankam te ekameka lagim ulovnk dinant. Ekach ghorant ravtonam,vonttik kan aslolea bhaxen ,dusre bazun kitem uloita tem mud’dom aikun bhava-bhavak ganvar ghala. Dusrea vordan konn bhitor sorta to he vatten ravtoleancho dusman zata. Tantum logn zal’lem cheddum tancho uzo perounk yeta. Oslea ghorabeant mog nam, xanti nam, bhogsonnem nam. Ani velean misak vetat, Jezuchi kudd xevtat .
Distea bhava-bhoinnink ollkonam ani man dinam zalear, diso-nas-olea Devak koso ollkhotolo ani man ditolo kai? Oslea rogtan doxim zal’lea ghorabeak bhorvan-so nam? Asa.
Eka ankvar cheddvacho fuddar porzollit distalo. Punn okosmat ticheo don-ui kidney cholonam zaleo. Soglleak akant. Tichi ek madr bhoinn apleo kidney aple bhoinnik lagtat teo pollevn vhodddilanchi porvangi ghevn apli ek kidney aplea bhoinnik lagta ti pollevn aple kidney-chi aple bhoinnik bhett keli. Kedo vhoddlo sacrifis .Az piddest bhoinn aple madr bhoinnichi kidney ghalun khoxal jivit jiyeta. Osleam ghoddnneancher niall kelear rogot sompeponnim doxim zainam mhonn spoxtt zata.

Amcheruch nodor ghalchi
Ami kosle doxer asanv tacher ami lokx ghalchem. Dusmankayecheam vontteamnim ami somazant vaitt nirop ditat mhonn ani jem jivit ami jiyetat tache vorvim ami Devak okman kortat mhonn niall korcho. Doxim zal’lem rogot ekttaim haddunk konnem tori fuddarak ghevcho. Kantte toptole. Koddu lagtolem, punn bhorvanxean vatt tanktoleak pormollit fulam ani rosrosit follam melltolim.

Nevel Vell'lekar