GULAB-cho Rupea Utsovi Disa, Rajkarnni Kiteak?
GULAB-acho Rupea Utsovi xevottacho suvallo Janereche 3rer 2008 zatalo mhonn Dezembr 2007, Gulab masikar ani internet-ar jahir zalam. Tech porim Fr. Freddy J D’Costa Memorial Trust-an ghoddun haddlole sohit’ya boropam spordeche jikhpeank inama bhettoitole ani toxench Konknni borovpeanche som’man zatelem mhonn kolloilam. Dobajeak Goyche Mukhel Montri Digambar Kamat ani NRI-Goa Commissioner Adv. Eduarto Faleiro manache soire koxe astele mhonn gomoilam.
Montreachea hatantlean Gulab Puroskar divnche nhoi ani svikar korteleank opman korcho nhoi mhonn Gulab Setembr 2005 Vachpi Boroitat hea bhagant hanvem boroilelem zalear, Gulab Puroskar-2005-2006 rajkarnni nasun Konknnink yogdan ditele namnechea mon’xachea hatantleant Gulab puroskar vanttpan ail’le mhonn ‘Gulab Puroskar Somitik Porbim’ divn Setembr 2007 Gulab-ar hanvem chitt boroileli asa.
Xevottak Rupea Utsovak mukhel soire dog rajkarnni monis astele ani mhaka dista tachech hatantlean ghoddie inamam bhettovpan yetlim ani vhodd Konknni borovpeancho som’nam zatolo, Zalear disonam tumkam ho 25vis vorsancho nirmoll ani koslench khott naslolo GULAB xevottak hea mon’xachea hatantlean bostovpan yetlo mhonn? Hea mon’xanim Konknni khatir kitlem yogdan dilam? Gulab-an 25vis vorsam apli nirmollai khantte-funttechi vatt cholun sambavlea zalear nimnnea vellar Gulab-acho bolatkar, Goychem padd kortelea ani broxttachar korpeanchea hatantleant kiteak? Ani konnuch vhodda manache Konknnink yogdan dil’le mahan monis nant kai? He vellar mhaka ontor’raxttrik songitkar Remo Fernandes babachi yad yeta. Goy luttat tanchea hatantlean Goa State Award svikar korunk tannem nakarlolo asa.
Gulab-chea Rupea Utsovi Dobajeak sogllo ies anvddetanam, Konknni khatir koslench yogdan korunk naslelea mon’xanchea hatantlean inam ghevn Gulab-acho pormollit pormoll ibaddinakat.
Lino B. Dourado
No comments:
Post a Comment