Don Dhonianchi Seva

Don Dhonianchi Seva

- Ramkrishna Zuarkar

Duddu boro titlo vaitt. Bolsant aslear boro, mathear dovorlear vaitt. Magir to motint rigta. Duddvacho mog lagta ani mon’xancho mod vaddta.
Duddu zoddun zaite vhoddle duddvankar zaleat. Punn soglech duddvanche dhoni nhoi. Duddu tancho dhoni ani te duddvanche gulam’. Te duddvank khelloinant.Tor duddu tankam nachoitat. Naka zal’leo kornneo korunk laitat.
Dev amcho dhoni. Punn kaim zann duddvank-ui aplo dhoni mantat ani dogainchi seva korunk sodtat. Hi don dhonianchi seva sarki nhoi. Magir sorginchem sukh kitem tem somzonam. Duddvantuch sorg mandunk lagtat.
Zaite zann poixeanche axek boreponn ogddaitat. Rajkornni fuddari porjechi seva korta mhonntat. Punn tancho mogacho dhoni poiso zatokuch dogainchi seva korunk tankam avgodd zata. Tankam duddvanchi porva ani porjechi beporva zata. Duddvanche axek lagun boreo-boreo yevzonneo te padd ghaltat. Poixe kitle-i kelear as bagonam, lakh zatoch krutt korche-xe dista. Jinn sompchelo vell ailo torui poixeanchi as somponam. Te khuim dovorche, kitem korchem tem kollonam. Velean apovnnem ailear porian tancho jiv poiexam kodde oddta. Ani jiv modench humkollta.
Choddxe duddvanche gulam’ apunn Devachi seva korta, Deva aplo dhoni mhunn sangtat. Punn tancho mogacho dhoni duddu asta. Deva dhonia pav oxem te lokak dakhovnk mhonntat. Punn motint tanchea“Duddva dhonia pav”oxem asta.
Duddvamkar dev-bhokt mhunn dakhoitat te bhailean bore. Punn kallzant xanti nam. Duddvant Dev-bhokti ghalun ti godd korunk sodta. Punn dudant sakor ghalche bodlek dudant mitth ghal’lea vori zata. Devacho mog aslo tori-i duddvancho mod tantum mitth ghalta. Eka hatant Devosponnacho bavtto ani dusrea hatant poixeancho pottlo ghetlo mhunn sovong sobonam.
Somajik vavrant pasun poixeanchi as dhorlear somazachi seva sarki zainam. Porteo somazant dhoxi ghalchem kam’ ghiddta. Kaim zann devosponnan rajkoronn bhorxitat. Punn ti misoll sarki zainam.
Sahitik vavrant pasun duddu zaiti vatt laita. Sahitik vachpanchi porva korinastanam suvidha, sovloti ani puroskar sodunk lagta. Man naslear-ui cholta punn man-dhon zai oxem taka dista. Vachpeam koddlean puroskar ho khoro puroskar hem to visorta Ani sorkara koddlean puroskar ghevnk to axeta. Punn puroskaramnim purovlo zalear pasun tachi as somponam. Duddu ekvott foddunk mat huxar asta.
Halim don dhonianchi seva korchi sonvoim chodd zalea. Duddvank khupuch man divnk lagleat. Itlem-i asun adle gorib tori sukh dinant oxem dista. Kiteak tor tea kallar duddu amcho dhoni zavnk naslo. Atam mathear bosta.
Zaiteam zannank duddvantuch soglem sukh dista. Punn tantum sorginchem sukh sampddunk kotthin. Duddvanchem gulamponn soddun Devakuch dhoni manlear tem nizachem sukh mellum yeta.

(V-IXTT)