Romi ani Devnagrik Eksarki Sovlot

Romi ani Devnagrik Eksarki Sovlot: Mukhel Montri

Konknniche Romi lipyeche udorgoti khatir sorkar zai titlo duddvancho tenko ani sovloteo ditolo, oxem Mukhel Montri Digambar Kamat-an utor dilem.
‘ Jivit’ masikachea vorsavollichea dobajea vellar to uloitalo. Konknni bhaxechi udorgot kortanam sorkar devnagri ani romi oso bhed-bav korinam. Zoxi Gõychi udorgot zata toxi Konknni bhaxechi udorgot zavnk zai, oxem sorkarak dista. Dekhun devnagrik jeo sovloteo melltat teo romi lipyek-ui divpak sorkar zababdar asa, oxem Xri Kamatan sanglem.
Fuddlea don tin mhoineam bhitor Tiatr Akademi ghoddun haddpacho vavr suru zatolo, oxem-i Mukhel Montrean sanglem. Devnagri ani romi lipincheam vavurpeamnim ekttaim yeun vavr kelo zalear Konknnichi udorgot nettan zateli, oxem amdar Mauvin Godinhon sanglem.

15/9/2007

Mhapxeam bazarachi durdoxea
M.S; Eka kallar Mhapxem xar sobit ani nivoll aslem. Hangasorlo bazar thoddim vorsam Gõyche suttke adim bore manddavollin bandlolo, bazarachim gottoram bore toren vhanvtalim, tim kednach upott bhoron uronaslim. Punn atam ho bazar pollevnkuch zainam, jiv sarkoch vitteta, pavsachea kallar paim ghali sarki khuinch svatuch nam; gottoram udkant bhorun ot’tat. Nustem, mas ani bhaji-palo viktoleam svatan-cher ghann poddta. Bosim-manddar dhanvtereancho bazar bhorlole porim dista. Khuinchea vellar bosi tuka apttot tem sangunk zainam. Angod vattarant UTI benki lagchea rostea degecho vhall matyen purovla ani udok rostear yevn tollem zalam. Hem soglem Mhapxenche nogorsevok polletat tori durusti korunk fuddem soronant. Tannim kel’leo bhasavnneo te pallinant. Atam tori upay ghetit kai mhunn lok ravta.
Diogo M. Fernandes,
Mhapxem

V.Ixtt-ak porzollit boroinnar
M.S; Pri. Ubaldo Fernandes, V.Ixtt-acho sompadpi zait porian hem satollem, mhaka kednam- kednam-i rag haddta, dusre pavtti huskeant ghalta. Chodd korun mhojem mon uzvaddayta, mhaka hansoyta ani kednam-i dongrar vhorta ani uprant sorgar pavoyta ani kupantlean sorgachi vatt ani uzvadd dakhoyta.
Hi chitt chodd lamboinam, “Romeo, tujem borovp short kor mhunn fadar mhaka sangot aila. Aiz fattlea donuch ankam vixim sangtam: 18/8/07 tarkechea V.Ixtt-ar Leon Bent baban “Freeway to Healing and Health” ho itlo ruchik ani uzvaddik lekh boroyla to hanvem zaite pavtti vachunk zai mhunn mezaruch dovorla. Osle lekh mhojem jivit fuloytat ani follaytat. Dusro 25/8/07 tarkecho, V.Ixtt-ar Ramkrishna Zuarkar-baban “ha-ha-ha Amdar baban-cho khell tiatr” mhunn boroylo. Hanv hans-hans hanslom. Hanspak mhonn kednam-i tiatr pollevnk vetam, 60 rupya moddun tikett ghetam. Zaite pavtti zaito hanstam, kednam-i vajetam ani ordo tiatr pollevn ghora yetam, kaim tiatristank churchurtam. Kola ani sonskrutay aiz itli sokol pavlea?
Hansoun-hansoun amgelea “sovai vo ordea xanneam” amdarancher chabuk marpant ho huxar R. Zuarkar bab, No.1. Fattim hanvem oxench kitem V.Ixtt-ar boroilelem: Amgele amdar ani montri amcheam tiatristam von odik fanki zaleat. Rajki machier te Gõykarank funkott tiatr dakhovn, bhorpur hansoytat. Hea tanchea tiatra udexim te lakamnim rupia apleak zomoytat hi gozal veglli. Jevonn naslear Gõykar mortolo. Lakh naslear montri mortolo! Dispottim funkott tiatr pollevnk mhaka atam Ponnje Kala Akademint vochpak naka. Gõycheam motdaramnim mhaka je amdar dileat, tanchem nattok tiatr, tomax zagor, khell-tiatr pollevn hansunk vo roddunk amger T.V. ghorant asa.
Romeo Almeida,
Alto Porvore.

Khuneank sampddaytat, Pulisank xabaski
M.S; Adlem Gõy atam amkam urunk nam oxem zaiteam Gõykaranchea tonddantlem aikunk yeta. Veta thoimsor maramari ani khun zatat. Punn amche pulis guneanv-kareank sampddaunk vavurtat mhonn tankam xabaski. Halinch Samir Mapari tornnateak marun uddoilelea khuneank nitik ube kortat mhonn aikolam. Tor hi nit favo toxi zavchi mhonn lok magta. Nitichea kamant onit bhitor sorunk favonam. Avoik put mellchonam, torui astanam tika bhorpay (compensation) divpachi khast formailear upkarot?
Rosario Carvalho,
Aldona.

Mandrem-Keri rosto durust korcho
M.S; Mandremcho ani Kericho lok PWD-chea Montri Churchill Alemao-ak ani Mandrenchea motdarsonghachea amdar Xri Laxmikant Parsekarak vinonti kortat; Mandrem tem Keri rosteachi poristhiti borich padd zalea tachi durusti korchi. Tera rosteavelean vetanam provaxeank kalliz hatant dhorun vechem poddta. Konn-ui piddevontak hospitalant vhortanam kosle halaval zatat tem pollevn piddevontache churchure distat. Atam pavs somptanch PWD rosteanchi durusti korunk lagtole tednam hea-i rosteacho ugddas tannim monant dhorcho mhonn lokachi magnni asa. Thoddeam zageancher ho rosto oxir asa thoim rundaunk vo rund korunk zainam zalear-ui to sarko korcho ani hea ganvanchea lokache tras unne korche. Amcho Montri Churchill bab ani Amdar Lxmikant bab amchem magnnem bherea kanar ghalche nant mhonn amkam khatri asa.
Danzil D’Souza,
Keri- Peddnem

Konkan relveche bhognnar
M.S; Konkan Reil-gaddi bogor-bogor ‘sick’ poddta; Setembrache poileruch, pavsak lagon, Ratnagiri vattarant, dongor kosllolo reil-rostear mati poddli, ani reil-gaddi bond dovorchi poddli; reil-gaddeo Londachean dhaddcheo poddleo. Oxem zaite pavttim ghoddlam. Veg-veglleam vattaramnim oxem ghoddtlem mhonn, adim-fuddench, zannaramnim sangun dilolem, chollvoll suru kel’li, ho khottlo korttant porian pavlolo. Poromporik Kormollechea Tolleachi durdoxa zateli mhonn gazoilolem. Sanglolem toxem atam zata. Tolleantlem nistem somplem, bokim uddun gelim, dusrem pik gelem.
Zannaramnim sanglo-lem: Konkan Kinareveli mati mov xetam ibaddun vetolim, zaite pul bandche poddtole, bobdam kantovchim poddtolim, dekhun hi Konkan Reil Nove Kabizadintlean (Novas Conquistas) dongran-velean vhorchi, thoim-sorleam lokak yeradari khatir titleo bosi nant. Aiz sanglolem toxem ghoddta. Minerank team dongravelean reil-gaddi naka asli. Podvi mineran-chi, durdoxea porjechi.
Moren de Souza, S.J.

Mottve lekh odik ruchtat
M.S; V.Ixtt-ar borovpi onek toreche asat ani veg-veglleo gozali te amkam sangtat. Tomazi-nho bab Adim ani Atam chitarta zalear, Zuarkar bab dukhoinastanam sui topta. Pri. Moreno veg-veglle ugddas kaddta, purvilem sangata, khub amkam zagoita. Pri. Nevel Vell’lekar oparin-chim bhanddaram sonspota, Pio bab aplea monantlim mannkam ugoddta, Romeo bab potinik tasun pottbhor hansoita. Bonaventure bab itihasik goxtteo sangta. Xabaski amchea dhanvteam penancheam boroinnarank. Itlich mhoji suchnna: mottve lekh, sadeam utramnim sanglear tem vachpeank odik ruchta.
Fatima Barreto, Divchole